A Axencia de Doazón de Órganos e Sangue (ADOS) participará mañá, venres 16 de outubro, nunha nova edición do VI Paseo Pola Saúde que terá lugar na Valenzá (Barbadás). ADOS desprazará unha unidade móbil que estará estacionada na Avenida de Celanova, das 09:30 ás 14:30 e das 15:30 ás 21:00 horas e instalará unha mesa na que será posible recoller información sobre as doazóns de sangue, órganos e medula ósea.

ADOS quere agradecer ao concello de Barbadás a súa invitación para tomar parte nesta iniciativa, na que teñen presencia unha vintena de asociacións e organizacións, xa que as campañas de fomento de hábitos de vida saudable tamén contribúen a sensibilizar á cidadanía sobre a importancia do solidario xesto da doazón para posibilitar o axeitado desenvolvemento do intenso labor asistencial dos centros sanitarios galegos.