h1

HOXE CELÉBRASE O DÍA NACIONAL DO TRANSPLANTE

- Dende ADOS celébrase este día publicando durante toda a semana, en redes sociais, os testemuños de galegas e galegos transplantados

Santiago de Compostela, 30 de ​marzo de 2022.- A Axencia de Doazón de Órganos e Sangue (ADOS), conmemora o Día Nacional do Transplante divulgando nas redes sociais as declaracións de distintas persoas que foron transplantadas, e así darlle as grazas a todas as familias que co seu xesto solidario da doazón de órganos permiten que outras persoas poidan seguir vivindo.

O obxectivo principal do Día Nacional do Transplante e agradecer a todas aquelas familias que permiten a doazón de órganos dos seus seres queridos, pois é un gran acto de xenerosidade e altruísmo que salva moitas vidas ao longo do ano. Ao mesmo tempo que se pon en valor a figura dos profesionais que fan posible co seu traballo que a cifra de transplantes continúe aumentando.

Así mesmo, salientar que en Galicia durante o 2021 efectuáronse un total de 298 transplantes, dos cales 140 foron de ril, 85 de fígado, 1 de páncreas, 24 de corazón e 48 de pulmón.

Ademais, subliñar que no 2021 Galicia acadou unha porcentaxe de negativas familiares do 16%, o que a sitúa por abaixo da media nacional, que é do 17%. Por outra parte, tamén salientar que 119.687 persoas teñen tarxeta de doantes de órganos en Galicia. Destas, 1.681 son novas tarxetas rexistradas no 2021 pola Coordinación Autonómica de Transplantes ADOS.

Documentos relacionados Documentos relacionados